myepinoy’s BLAG

Analyze and Synthesize everyone’s idea

June 29th, 2006

Ang likas at natutunan mong kaalamang mag aral at makinig ng ibat ibang pananaw upang makabuo ng isang magandang bagay ay syang magtutulak sa iyo para magtagumpay. — myepinoy

Napabalita sa opisina na uso na naman ang tanggalan. Marami ang kinakabahan at nag-iisip ng kung ano-ano, dahil karamihan sa mga natitirang Pinoy (OFW) ay marami pang obligasyon sa buhay tulad ng mga anak na di pa tapos sa pag aaral, bahay at lote na binabayaran at kung ano-ano pang mga kadahilanan. Sa pananaw ng karamihan, hindi pa sila handa na mawalan ng trabaho lalo na sa panahong ganito.

Kumalat ang balita na maiinit daw ang GaMa (GM) lalo na sa mga ekspat, at gumagawa ito ng paraan para makahanap ng butas. Mayroong nakapagkwento na ang GaMa daw ay nag-iikot sa buong opisina at laging nag aabang sa mga pakalat-kalat na mga empleyado sa oras ng trabaho.

Habang naglalakad si Kulas, narinig niya ang dalawang kabayan na nag uusap.

Kabayan 1: Pre, balita ko malimit daw nakaabang ang GaMa sa may elevator na papunta sa parking. Kaya ako, naghahagdanan na lang, At least, madali ko makikita kung merong parating at makaiwas ako.

Kabayan 2. Aba, mas delikado yan, kasi lagi din sya nakaabang sa may hagdanan. Kaya, ako sa elevator na lang. At least mas mabilis at safe doon. Pag press mo ng button, doon ka na agad.

Dahil isa si Kulas sa di pa handa na mawalan ng trabaho, napaisip sya ng malalim. Pinag-isipan nyang mabuti kung alin sa dalawang narinig nya ang mabisang strategy kung sya ay tumatakas sa oras ng trabaho. Sa isip ni Kulas, parehong tama ang kanilang tinuran at nabuo sa kanyang isip, “Magaling ang kanilang ginagawa. Kaya, dapat ang gagawin ko, pagsasamahin ko ang parehong style nila. O di ba, three heads are better than one.”

Nakahinga ng maluwag si Kulas at pakiramdam nya, di sya magmimintis sa ganitong stratehiya. At medyo nagyabang pa. “Ibahin nyo si Kulas. Magaling, matalino, mabilis ang utak at creative gumawa ng solusyon.”

Isang araw, habang paalis na naman si Kulas para maglakwatsa, naisip nya, “Dapat i-implement ko na ang aking strategy. Buti na ang sigurado”

Kaya nga, dali-daling bumaba si Kulas sa hagdanan, pasilip-silip at ng makarating sa ibaba, umakyat naman sya na patakbo. Noong nasa itaas na, “Aba, tama nga si kabayan 1, safe ako dito.”

Habang humihingal pa, pinindot naman ni Kulas ang button ng elevator. Sumakay agad sabay pindot ng B (Basement). Nakababa ang elevator sa Basement. Sumilip-silip. “Safe din ito.Tama din kabayan 2.”

Noong nasa labas na si Kulas, buong pagmamalaki nyang sinabi sa sarili. “Ang galing mo talaga Kulas. Maganda ang plano mo. Dapat, ganito lagi ang gagawin mo araw araw para safe ka.”

Kaya nga, simula sa araw na iyon hangga ngayon, ganito na ang ginagawa ni Kulas tuwing siya ay tatakas sa oras ng trabaho. Bababa sa hagdanan ng dahan-dahan, sisilip-silip kung nandoon ang GaMa pagkatapos ay patakbong aakyat ng hagdanan pabalik sa second floor na kanyang pinanggalingan at saka doon sya sasakay ng elevator pababa ng basement.

At yan po ang strategy ni Kulas. Kung gusto nyo subukan o gusto nyo i-improve, iwan lang kayo sa ibaba ng inyong suhestyon. Ipaparating ko po agad sa kanya.

Entry Filed under: Daily Life, Si Kulas